ಬಿಸಿಲ ಧಗೆ

ಅಯ್ಯೋ, ಬೆಂಕಿ ಉಗುಳುತಿದೆ
ತಾಳಲಾರೆ ಉರಿಯ ಧಗೆ |
ಕಾಡಲು ಬಂದೆಯಾ ಹೀಗೆ
ಬೆಂಕಿ ಕೆಂಡದ ಬೇಸಿಗೆ ||

ಪ್ರಖರತೆ ಹೊತ್ತು ಬೆಳಕಾಯ್ತು
ಹಗಲೇ ದುಸ್ತರವಾಯ್ತು |
ಗಾಳಿ ಇಲ್ಲ, ಬಿಸಿಲೇ ಎಲ್ಲ
ಕಾಲ ಕಳೆಯದಾಯ್ತು ||

ಹಗಲ ನೋವೆ ಸಂಜೆ ನೆನಪು
ಬಿಸಿಲ ಧಗೆಗೆ ನೊಂದೆನು |
ವಿದ್ಯುತ್ ಕಡಿತ, ಹುಳುಗಳ ಕಾಟ
ಶಪಿಸಿದೆ ಬೇಸಿಗೆಯನು ನಾನು ||

ಧಾರಾಕಾರ ಬೆವರ ಧಾರೆ
ಹರಿಯುತಿದೆ ಮೈಯಲ್ಲಿ |
ತೋಯ್ದ ಬಟ್ಟೆ ಹಸಿ ಮುದ್ದೆ
ತೆಗೆದು ಹಾಕಬೇಕೆಲ್ಲಿ ||

ಹೊರಗೆ ಹೋಗದಾಗದು
ಒಳಗೆ ತುಂಬಿದೆ ಧಗೆ |
ಎಪ್ರಿಲ್, ಮೇ ಅಯ್ಯೊ, ಅಯ್ಯೋ
ಶಿವನೇ ಕಳಿಸು ಗಂಗೆ ||

ಮ.ಕೃ.ಮೇಗಾಡಿ, ೯೮೪೪೦೮೮೧೩೩